‘A notte ‘e Natale a Betlemme

di Teresa Grimaldi

Ndà l’osteria chiena chiena ‘e gente,
‘o friddo senteva poco poco,
c’era nu fuculare gruosso assai
e ‘o fuoco se spanneva chianu e forte
e se fermava llà vecino ‘a porta.

Tutti parlavano e po’, all’impruvviso,
nun se sentette manco cchiù na voce,
guardavano co ll’uocchi spalancati,
‘o stesso punto, n’a bella figlia e n’ommo malandato.

L’oste addimmannai:
“Ma vuie chi site?
E che vulite accà e a me a chest’ora?
Nun tengo posto manco pe na seggia
chesta è na cantina, nò na reggia!”

E ‘o vecchio c’a voce d’a pacienza:
“Simme stanchi assai,
faciteve strumento ‘e provvidenza,
levateci, stanotte, a nde sti guaie!”

E l’oste che era burbero, ma buono
‘e ndirizzai verso chella stalla,
a isso, a essa e ‘o povero aseniello
e llà dinto durmeveno ncoppa ‘a paglia
nu voio e quatte pecorelle.

‘O scuro era forte e ogni tanto
‘a gente d’a cantina llà guardava
senteve comme ‘a pena dinto ‘o core
e nun capeva che ce capitava.

Ma po’, quanno tutto se calmai
na luce alluminai chella grotta
na voce ‘e peccerillo se sentette
e ‘a primma nenia ‘a mamma le cantaie.

Curretteno tutti chelli ‘e l’osteria,
vedettero na visione bella, ‘e cielo,
e pure ‘o cchiù mbriaco chella sera,
se nginucchiai che lacrime ndà l’uocchio
e senza capè che steva succedendo
p’a primma vota ndè tutta ‘a vita soia
sentette nu calore dint’o core,
capette ca pure isso
era preziuso assai p’o Signore!

Letto 6302 volte